政情：細仔打機 楊全盛搞網上直播
唔少家長都唔鍾意子女打機，擔心會荒廢學業。作為兩子之父嘅智慧城市聯盟會長楊全盛（Eric）就話，佢呢代家長都係打機長大，所以唔介意囝囝打機，仲話正協助細仔搞網上直播打機添！
親子活動助修補關係
Eric表示打機係親子活動，更可以用作修補關係，因為平日斥責完囝囝後，佢都會藉一齊打機去打開話題，令到囝囝唔會再因為受責罵而耿耿於懷。
佢又話，十歲嘅細仔鍾意說話，平時經常喺網上睇其他人打機嘅片段，所以對搞網上直播非常有興趣。Eric呢位廿四孝爸爸不但無阻止，更落手落腳為佢準備硬件。佢話網上直播需要唔少設備，只得一部電腦係做唔到，仲要有收音器材同鏡頭。雖然聽落好似幾複雜，但小朋友學習速度快，相信唔使好耐就學得識。