政情：「美」好假期 張宇人感恩 雪糕甜入心
立法會經過兩個多月抖暑後快將復會，一批立法會議員就把握最後時間充吓電，其中飲食界立法會議員張宇人就去咗美國玩，早前佢於Facebook上載多張靚相。大家都知張宇人勁鍾意食雪糕，呢趟去美國梗係少不了歎雪糕喇！佢都有上載食雪糕嘅相，仲留言話只要懷着感恩嘅心，食一杯數美元嘅軟雪糕都足以令人食得津津有味喎。
感受大自然洗禮
張宇人喺網上圖文並茂憶述喺美國度過一連幾日嘅假期。佢由愛達荷州去到懷俄明州，足迹遍布黃石公園、總統山等，其中愛達荷州小鎮不乏美國西部風味，充滿牛仔氣息。佢又慶幸長期喺繁忙嘅都市生活後，可以感受到大自然嘅洗禮。
講咁多，又點少得食嘢？張宇人話，一個旅程係咪完美，不在乎去咗幾多地方，只要懷着感恩嘅心，一杯數美元嘅軟雪糕都可以食得好滋味。都係嘅，知足常樂最緊要。