中環出更：星執業資格又惹質疑 何君堯反擊
立法會議員何君堯最近向主張港獨者提出「殺無赦」論引起連串風波，真係一波未平一波又起。繼有網民質疑何君堯係咪真係英國及威爾斯執業律師之後，再有人質疑佢喺新加坡執業資歷，話翻查新加坡執業律師名冊後，發現並冇「何君堯」呢個人喎。何君堯就喺社交網站貼出由新加坡最高法院發出嘅證書，表明自己有新加坡律師資格。
荃灣區議員譚凱邦尋日喺社交網站話，何君堯除咗聲稱喺英國執業外，亦都喺新加坡執業，不過佢喺新加坡律師會執業律師名冊就搵唔到有佢個名，認為何君堯要解釋點解名冊上冇佢個名，但又喺去年立法會選舉時聲稱自己喺新加坡執業。
網上展示證書
何君堯及後就喺自己社交網站展示由新加坡最高法院發出的證書，仲寫到︰「黃屍們，睇清楚，我是何君堯，我的新加坡律師資格在此！」該證書顯示佢喺九五年註冊為當地事務律師，唔知咁樣係咪可以釋除疑慮呢？
卓妮