漢奸走狗都有一個共通點，就係「人來瘋」，一見到外國人就好似啪咗興奮劑咁，骨頭都酥埋。「千古罪人」肥彭「回魂」香港，成班反對派政客即刻群丑拱衞，山呼萬歲；而佢哋米飯班主漢奸黎日前接受日本作家專訪，亦係鬆毛鬆翼語無倫次，唱衰香港同國家零舍落力，左一句「香港淪落」，右一句「中國崩潰」，問你死未。
聽吓漢奸黎廢噏啲乜？佢話喎，香港愈來愈淪落，係因為中央干預愈來愈強，以前嗰隻「無形之手」已經變得「有形」；佢又話，想香港淪落速度慢啲，最好係內地出現經濟危機，咁香港至會有比較平穩嘅將來云云。
呢啲咪豬八戒倒打一耙囉。香港之所以愈來愈淪落，唔係因為中央「有形之手」干預，而係漢奸黎之流甘當洋奴走狗，香港被外部勢力利用為反共基地同顏色革命橋頭堡，特別係壹淫媒，日日對年輕一代洗腦，煽動後生仔走上街頭，漢奸黎本人更加瞓身領導佔中，就係咁，成個香港雞犬不寧，年輕人離心離德，唔沉淪至奇！
講開壹淫媒對年輕人洗腦，漢奸黎嘅「中國崩潰論」可謂鬼拍後尾枕。大家有眼見，淫媒抹黑醜化內地無所不用其極，連派記者假扮駐港解放軍周街問市民攞錢都夠膽死，配合埋一班政棍學者狼狽為奸爭相唱和，宣揚「五星旗不再升起」、「中國十年必有大變」，年輕人幻想「支爆」有之，大學校園播獨有之，就係被上述邪說耳濡目染之故。
當然喇，呢啲只係洋奴漢奸嘅一廂情願，中國唔單止貴為全球第二大經濟體，更加係拉動世界經濟增長嘅火車頭，各國爭搭順風車，即使強如美國，國內外問題一大籮，加上狂人總統商人出身，（抓）銀至上，冇能力亦冇興趣喺中國搞顏色革命，咁嘅環境下，漢奸黎洋狗餅勢必減量，就算落足鞋油，狂讚特朗普「令美國再次強大」，都係嘥氣。
有人就講得啱嘞，「中央有形之手」真係咁把炮，有啲人一早已經踎監踎到屁股開花，邊可能繼續也文也武打橫行吖。事實係，「中央有形之手」大家見唔到，幫漢奸黎撐腰嘅「有形司法保護傘」反而路人皆見。佔領之亂距今就快三年，被視為最大金主兼黑手嘅漢奸黎至今仍然逍遙法外，司法當局唔係賴「證據太多」，就係話「檢控冇時間表」，總之死都唔肯動漢奸黎一條頭髮，話唔係「懼外症」發作，三歲細路都唔信。
打蛇打七寸，擒賊先擒王，頭號賣港賊一日不除，香港永無寧日。今時唔同往日，東風壓倒西風，漢奸罪不容誅，連外部勢力都照唔住吖！