政情：曼谷物業升值少 徐德義呻笨
早幾日政府公布部分副局長及政治助理嘅利益申報情況，食物及衞生局副局長徐德義擁有六項物業最引人矚目，當中包括一個位於泰國曼谷嘅商業單位，唔通佢趕上呢一輪去東南亞置業嘅潮流？前晚我哋喺九龍社團聯會嘅酒會上見到徐德義，梗要捉住佢問個究竟。
早知香港買樓好過
徐德義解釋話，呢個曼谷物業係地舖，已買咗十幾年。點解揀中泰國？因為當時識咗唔少泰國朋友，佢成日過去探佢哋，所以就同家人買嚟投資囉。咁持貨十幾年，增值情況如何？徐德義笑笑口話：「都係得個吉！」事關當地二手市場唔夠活躍，所以樓價冇乜增長，只係微升小小，自嘲係投資嘅壞例子喎。佢又話，如果有早知，就喺香港買物業好過喇！