中環出更：林國昌幫鄉議局執委爭津貼
鄉議局執委會開會經常「火花四濺」，早幾日討論鄉議局研究中心撥款申請就引發一場激烈舌戰，其實當日傾到村代表津貼問題時都有火花。執委林國昌認為，除咗村代表津貼，都要爭取鄉議局執委可申領，仲話錢唔係重點，而係關乎江湖地位喎！
林國昌指出，各級議員都有津貼，但同屬法定組織嘅鄉議局成員就冇，每次開會都要自付交通費，唔明白點解要貼錢去搭車開會囉。佢主張鄉議局應該力爭，事關涉及鄉議局嘅江湖地位咁話。
鄉紳批村代表走數
另外，上水鄉事委員會主席侯志強就話，村代表津貼升幅連賣旗籌款同車馬費都唔夠，但係區議員同立法會議員酬金升幅就有成倍增長，咁咪代表政府睇唔起村代表囉！不過，有鄉紳爆肚話，有村代表當初同意捐錢予鄉議局起大樓，但事後卻走數，批評佢哋無貢獻又唔守承諾，反問點解要幫佢哋爭取津貼喎。
卓妮