中環出更：實習生冇份開董事會 蔡德昇嘆遇騎呢投訴
香港青年聯會（青聯）早前舉行分享會，畀參加過青聯學生交流網絡暑期實習計劃嘅學生互相交流吓，青聯主席郭永亮、常務副主席蔡德昇（Stanley）等人都有到場。依家有好多團體提供北上實習機會，Stanley亦見識唔少騎呢個案，試過有家長竟然因為女兒實習時無得開董事會，而中途接個女返港，認真誇張。
Stanley話，呢個個案發生喺其他實習計劃，有日佢收到嗰位家長嘅電話，話個女北上實習學唔到嘢，所以就自行買張機票接女兒返港。事後佢約見嗰位學生及家長詳談，家長竟然覺得個女應該有份旁聽董事局會議，唔應該只係準備董事會文件喎。
許華傑：試過喺美國派傳單
做實習生仲咁揀擇，態度梗係唔啱喇！青聯顧問許華傑就話，佢讀大學時放暑假，試過喺美國派傳單，當年覺得自己係大學生卻走去派傳單，都真係要放下身段至得。Stanley就試過暑假期間賣油漆及女人內衣褲，笑稱暑期工應該要試吓以後都唔會試嘅嘢。
郭永亮嘅工作經驗就冇咁多姿多采，佢讀會計，實習時都係做會計，畢業後又順理成章做呢行，所以覺得自己比起參與實習計劃嘅學生，睇得唔夠多嘢喎。
龍子明曾做便裝跟警行咇
青聯顧問龍子明都喺度，佢共服務過三個紀律部隊。事關細個時香港經濟環境冇咁好，學生搵工都係為咗「搵食」，佢讀書時就做過輔警賺外快，又試過做便裝跟正規警察行孖咇，後來入咗懲教署做正職。當年為咗一邊工作一邊讀書，佢長期返「夜尾更」，朝早八點才收工，刻苦完成學業之後，最大得着係依家覺得咩困難都冇乜大不了。
卓妮