政情：鄉議局 研究中心狂追撥 被鬧爆嘥錢
新界鄉議局研究中心由一四年三月組成，運作短短三年就已經七次獲批行政經費，而今年二月亦獲一百萬元撥款，但至今只剩不足九萬元，所以尋日再度向執委會尋求撥款一百萬元，結果引發舌戰、大傷和氣！
質疑是否有必要保留
有鄉紳鬧爆上次批出時已稱最後一次，質疑有冇必要保留研究中心，更有人指出鄉議局虧蝕嚴重，大樓營運已經蝕咗六百萬元，而行政經費收支更累計蝕成一千萬元，即使肯定研究中心作用都認為要開源節流，難怪研究中心主任薛浩然都大嘆，講錢失感情，連手足情都放埋一邊喇！
不過，鄉紳並唔係一面倒鬧爆，好似執委鍾偉平就指出研究有助了解本錢，仲建議研究棕地等議題。有元朗嘅鄉紳仲幫口狠插有人對事不對人，仲質疑研究中心運作至今先有批評聲音，係有人趁前主席劉皇發離世喎！一輪舌戰後最終批出撥款，事關研究中心合約到明年先結束，但約滿後嘅命運就將交小組決定喎。