路，係由人行出嚟嘅。楊斯雅（Cindy）由全職模特兒到參選港姐，再由演員變身成網絡談情說性KOL兼網上性用品店老闆娘，跟住再開埋實體店，由一間變三間，究竟點解會有咁大嘅變化，同埋佢得到乜嘢啟發呢？
情趣用品喺唔少人嘅印象中，總係離不開鹹濕、色情及低俗，而對於本身係模特兒兼演員嘅Cindy嚟講，點解會毅然進軍呢個行業呢？Cindy解釋於2014年喺電視台工作差唔多兩年，而佢跟同喺電視台工作嘅男友發現，兩人嘅積蓄幾乎用盡，於是萌生從事網上生意嘅諗法，當時佢問男友做乜嘢生意好，男友便隨口講話：「賣性用品啦！」其實Cindy同男友之前都有了解過性用品嘅市場，因此佢聽到男友咁講時，認同性用品生意有商機，就係咁開始喺網上售賣情趣用品。
Cindy表示：「當時我都有做飾物同家品嘅網上生意，但係發現性用品嘅反應相當唔錯，因此便慢慢做起嚟。」至於開設實體店卻又係一番機遇，由於網上生意好快上軌道，故此屋企再擺唔落咁多貨，諗住租舖開店卻又一直遇唔到心水舖位，就喺2014年底，Cindy同男友途經旺角先達商場時發現有商舖平租，睇舖後一見即合便開設第一間情趣用品店。
喺網店同實體店同步進行期間，Cindy亦開始喺網上談情說性，喺YouTube上分享嘅影片中，最高點擊率嘅一條片超過140萬點，稱佢為呢方面嘅KOL絕對名副其實！不過話晒Cindy都係個女仔，由網上銷售轉戰實體店，變成面對面跟客人講性經，會唔會覺得尷尬呢？Cindy坦言起初都會有啲尷尬，雖然佢喺網上做節目都有講性話題，但面對面同客人講卻又係另一回事，唔知點講至好。不過喺店內工作咗大概一個星期後，發覺用正經、認真同專業嘅口脗和態度，跟客人傾談有關問題時，就唔會令人覺得有鹹濕嘅感覺。
咁女仔之家賣性用品，屋企人又點睇呢？Cindy笑稱其實本身冇諗過同家人講，但係男友卻堅持一定要話畀父母知，於是喺簽咗第一間舖嘅租約後，男友同佢一齊上門同父母講清楚，點知Cindy母親聞言後嘅反應竟然係：「嘩！咁都畀你哋諗到，非常好啊！」由於Cindy母親有做生意經驗，仲畀咗好多建議添！得到屋企人嘅支持固然重要，但係朋友們又點睇呢？Cindy就話：「好多朋友知道我做呢門生意後，反而會樂於分享佢哋嘅閨房問題，例如乾涸、床上技巧等，以前佢哋最多上網搵解決辦法，家陣有人可以回答呢類問題，因此佢哋都樂於同我分享房中事呢！」
Cindy最近設計咗一系列情趣用品，點解佢會有設計情趣玩具嘅諗法呢？Cindy解釋：「因為我有一個夢想，就係賣一啲好可愛，好適合少女用嘅情趣玩具。不過從事呢門生意幾年，一直搵唔到呢類產品，於是萌生自己設計玩具嘅念頭，及後遇到一家打算搵我做代言人嘅性玩具廠商，便向對方提議畀我嘗試設計情趣玩具，結果夢想成真。」作為美少女戰士粉絲嘅Cindy，以變身棒為設計靈感，推出具震動及自動彎曲功能嘅情趣棒。其後，佢又設計出可愛風嘅收陰球及情趣玩具消毒杯。不過圓夢嘅同時，佢覺得最大嘅滿足感仍在於客人嘅反應，佢表示：「最記得有位女客人，佢試過我推介嘅一款用品後讚不絕口，真係令我好開心。」
撰文：魂