政情：肥彭又回魂抽水撐到行
末代港督彭定康（肥彭）喺香港回歸二十年後依然陰魂不散，佢呢幾日訪港宣傳佢嘅自傳，又趁機對香港近期嘅熱論抽水，不但評論「雙學三子」黃之鋒、羅冠聰同周永康被法院加刑判囚事件，又話曾去信港府要求團結香港社會，更加喺港獨問題上加把嘴，然而肥彭口講港獨唔可行，但就話社會可以討論。肥彭不斷喺度指指點點，莫非佢想憑此提高曝光率，推高自傳嘅銷情？
星期一抵港嘅肥彭尋日出席一個午餐會，佢在任港督時擔任其私人助理嘅曾俊華（鬍鬚曾），同埋佢嘅前下屬、有「民主阿婆」之稱嘅前政務司司長陳方安生都有到場，簡直就係一堆舊電池。
批評袁國強覆核「三子」做法
肥彭講咗本自傳無耐就嚟料，開始對香港近日嘅事務指手畫腳。佢首先提到律政司早前覆核「雙學三子」三年前喺佔領行動期間衝擊政府總部東翼前地廣場嘅刑期，係政治決定；指呢個決定引起外國媒體質疑本港法治，如果律政司司長袁國強無諗過咁做會帶畀社會乜嘢訊息，就係「有啲天真」。其實，作為前殖民地官員憑乜嘢資格去批評港府嘅處事方法，若果佢自以為仲有影響力嘅話，睇嚟佢就真係「有啲天真」。
新政府話要和諧，肥彭又食住上乘機抽水，自爆三個星期前去信行政長官林鄭月娥，叫對方為團結社會做番啲事，話聲稱去殺人嘅言論做唔到團結，暗寸立法會議員何君堯反港獨嘅「殺無赦」言論。本港大學校園出現港獨標語引起軒然大波，肥彭又點會放過加把口嘅機會。佢重申港獨唔可行，但就認為社會應該容許討論，佢解釋話《基本法》都唔容許安樂死及同性婚姻，但社會唔會停止討論，仲話如果有人喺牛津大學討論蘇格蘭獨立，身為校監嘅佢係唔會阻止喎。
至於有人喺大學嘅民主牆奚落死者同家屬，以及逝世嘅諾貝爾得獎人，肥彭就承認言論自由即使非常重要，但亦唔代表無限制，希望唔同意見嘅港人可透過對話互相理解。
香港回歸咗二十年，肥彭仍然陰魂不散，不斷嚟香港或喺海外對香港事務指指點點，今次佢來港四日，預計聽日夜晚就會離開，難保佢呢幾日會繼續說三道四，抽水搞搞震之餘，乘機催谷自傳嘅銷情。