中環出更：運動健將蒙德揚游得又讀得？
讀書年代總會有啲學生係好活躍、運動爆分，有啲就係文靜書生讀書派，卓妮早幾日喺沙田馬場見到耳鼻喉專科醫生王賜豪（Jimmy）同信興集團主席兼行政總裁蒙德揚，原來佢哋係中學同學，仲係曾經同班嗰隻，不過Jimmy話蒙德揚讀書時係運動健將，游水好叻，仲係校隊添，而佢自己就係比較專注讀書嗰堆，加上之後二人升學路唔同，反而喺畢業後先見番多啲咁話。
喇沙仔出名運動叻，本身又係醫生嘅Jimmy冇理由真係唔做運動嘅，佢就好謙咁話自己唔太擅長，不過因為要Keep Fit，所以簡單打吓羽毛球都得嘅，但呢個年紀打波真係要分外小心，唔係好容易會整傷喎。另一邊廂，蒙德揚就即刻平反，話自己除咗做運動，其實讀書都唔差o架，雖然冇考過第一，但都冇考過第尾。卓妮問佢係咪考第二，佢就笑而不語囉！
跟曹星如學健康飲食
之後蒙德揚見到幾位馬會職員大熱天時拎住部平板電腦行嚟行去咁辛苦，仲停低睇吓有乜嘢幫到佢哋，原來馬會依家有個慈善活動，只要登記電郵後連續二十一日跟指示完成任務，馬會就會捐錢畀聯合國兒童基金香港委員會。蒙德揚於是揀咗參與其中一個挑戰，以為佢咁鍾意做運動會選擇跟騎師「雷神」莫雷拉喺屋企健身嘅挑戰，結果佢就揀咗跟「神奇小子」曹星如學點樣食得健康。唔知關唔關佢之前做過腸手術事，現時佢對飲食都顯得分外關注及小心。
轉頭見到沙田區議會前主席韋國洪，佢話之前馬季抖暑過咗澳門幾日，諗住放假同家人輕鬆吓，好在係喺打風之前去啫，所以冇遇到狼狽嘅情形。
卓妮