孔夫子教落，名不正則言不順，言不順則事不成。好似香港記者協會咁，明明個牌頭掛住「香港」兩隻字，實際上親疏有別，漢奸黎旗下壹淫媒有乜頭暈身(興)，佢哋第一個撲出嚟忠心護主，對於壹淫媒本身嘅醜聞就闊佬懶理，裝聾扮啞，一早應該正名為「淫媒記者協會」、「爛果記者協會」喇。
呢嗱，話口未完又嚟喇。記協尋日發表聲明，話澳門前日舉行立法會選舉，逾十名包括爛果報在內嘅本港記者被澳門當局拒絕入境，對此表示「高度關注及遺憾」；又話會去信澳門特區政府及本港保安局，要求解釋記者未能入境嘅原因，煞有介事咁款。
咁就奇嘞，本報記者進行正常採訪，畀漢奸黎兜口兜面「×老母個×」、恐嚇「實搵人搞你」，又唔見記協「高度關注及遺憾」，去信漢奸黎要求交代？鬼咩，係人都知記協食漢奸黎奶水，飲蘋果汁大，梗係第一時間回應喇，難為記協平時開口「捍衞新聞自由」，埋口「公平公正」，依家一鑊現形，原來只係漢奸黎私家走狗。
講真，一個地方有自己嘅出入境政策，唔歡迎特定人士入境亦係國際通例，唔使下下向外人交代。淫媒自己知自己事，佢哋唯恐天下不亂，無事生非、生安白造當家常便飯，澳門當局拒絕引狼入室，好正常啫。
記協有名你叫「妓協」，邊個「恩客」肯出錢就服侍邊個，出得愈多服侍得愈周到，記協急淫媒所急，根本就係分內事。前排爛果報搞「假自僱，真裁員」，記協話就話頂唔住壓力表達關注，但成篇聲明有氣無力，冇嚴詞譴責不特止，就連「黎智英」三個字都唔敢提，與其話係幫同業維權，不如話幫主子緩頰。試吓轉換其他傳媒機構，莫講話cut cost炒人，連撤換一個專欄作家，記協都要插隻腳埋嚟管，至於漢奸黎咯喎，赤膊上陣向專欄作者施壓，抹黑對方係「中共臥底」，繼而全面封殺，記協就突然失明當睇唔到，西諺所謂don't bite the hand that feeds you，就係咁解。
當然喇，世上沒有免費蘋果汁，記協除咗幫漢奸黎看家護院，亦會按照主子旨意瘋狂咬人。好似記協最近公布所謂年度言論自由年報，當中無喇喇開名批評《東方日報》舊年報道內地女律師王宇嘅做法，講到冇嘢好講，連內容有冇新訊息、篇幅長短等都拎出嚟說三道四，話唔係收金主柯打胡吠亂咬，講出嚟都冇人信。
講多無謂，行動最實際，一於改名「淫媒記者協會」，唔好再招搖撞騙影衰「香港」嘞！