政情：梁敬國轉戰電台 未開咪先甩轆
政府換屆兩個多月，唔少前政治委任官員都開始咗新工作，亦有人享受緊假期，過住寫意嘅生活。而商務及經濟發展局前副局長梁敬國離開熱廚房後，最近亦開始有新動向，就係去電台開咪做主持喇！
近日喺Facebook發現梁敬國現身電台嘅相片，原來佢去咗為一個電台節目開咪，嘗試做義工主持，並唔係正式返新工。佢仲喺節目上透露，離開熱廚房後過得好充實，因為去咗旅行而曬到黑黑實實，仲話放假連新聞都少睇而輕鬆咗添！
睇過節目嘅宣傳片，梁敬國就話本身鍾意講嘢，如果有人聽就更好，所以就去咗開咪咁話。不過佢拍片宣傳節目時就變咗倒米，事關佢呼籲觀眾留意節目時，竟然錯稱製作節目嘅電台做另一間電台，認真出師不利。雖然佢錯得離譜，但講錯後依然面不改容，非常淡定，睇嚟都幾有潛質向主持方向發展喎。