政情：梁志祥探病 驚見街坊齊入院
現今醫學昌明，令到香港人平均壽命都得以延長，但長壽都仲要面對老人病，分分鐘搞到要入醫院。立法會議員梁志祥都有同感，不過並唔係佢身體出現問題，而係佢去醫院探朋友病時，驚見全層嘅病人都係識得嘅。
梁志祥自爆，早前去醫院探一個朋友病時，抵達病房竟然見到多名街坊都入咗院，直言見到呢個情況嚇親，冇諗過咁多認識嘅人會不約而同入咗醫院，所以就由探一個朋友變咗探晒全層嘞！
佢其後更大嘆，香港因為醫療進步而延長咗港人壽命，但同時亦會加重醫療系統壓力，所以就覺得可以由社區入手，鼓勵市民多運動去增強抵抗力，預防勝於治療咁話喇！
雖然佢身邊有唔少朋友生病入院，但經常運動嘅佢睇嚟無驚過，因為佢自誇擁有望落健康嘅膚色，睇嚟佢都有足夠嘅運動量喎。
仲記得梁志祥幾個月前代表立法會踢友誼賽，以入球「大四喜」帶領球隊大勝，足證佢寶刀未老，而講親佢嘅踢波表現，都有唔少人大讚佢跑得快同有主導賽果嘅能力添！不過佢就話只係後生仔禮讓，助攻畀佢先入到喎，真係夠晒謙呀！