政情：西九主席 翻叮唐英年 CY冇晒面

政府尋日公布「翻叮」前政務司司長兼西九管理局前主席嘅唐英年，喺下月一日起，再次擔任西九管理局主席，任期兩年，係首次打破傳統，唔係由政務司司長兼任。一個又一個對頭人回朝，唔通係明落CY面？

CY在任嘅時候，喺今年四月下旬入稟高等法院，控告梁繼昌就UGL事件所發表嘅言論誹謗，其後又喺社交網站撰文，直指梁繼昌首先致函稅局局長要求調查UGL事件。

其後又再向立法會提交呈請書，要求成立專委會調查UGL事件，最後再加入調查UGL事件專責委員會成為委員。

身兼報案人、主控官同陪審員角色，存在角色衝突，要求梁繼昌辭任專委會成員一職，但梁繼昌堅拒辭職。然而喺新政府上台後，梁繼昌早前被委任做工業貿易諮詢委員會委員。

眾所周知，唐英年同CY曾喺二○一二年特首選舉中競逐特首，最終唐英年落敗，而政界至今仍然會以「唐營」、「梁營」區分不同嘅政界人士，唐、梁不和並非秘密，如今政府「翻叮」唐英年，加上委任梁繼昌做公職，CY嘅對頭人紛紛回朝，究竟係乜嘢一回事？

被問到今次再委任唐英年做主席，係咪「明落CY面」？特首林鄭月娥話「梗係唔係啦」，指唐英年有唔少商業經驗、市場經驗，係不二之選，如果對方唔做，就可能會放低呢個計劃喎。「翻叮」唐英年嘅原因係咪咁簡單，真係信不信由你嘞！

「維港巨星匯」搞到一鑊粥

雖然，政府大讚唐英年擁有政商界經驗，但係睇番佢以往喺政府工作嘅時候，曾經處理「維港巨星匯」混亂百出、慘淡收場，仲造成嚴重虧蝕，引起各方抨擊，外界更加質疑唐英年卸責當時嘅下屬，總之成件事就搞到一鑊粥咁啦。

依家西九文化區正正面對資金不足嘅問題，到底飲紅酒就叻嘅唐英年，再次主事西九，做唔做到佢所講嘅量入為出呢？實在令人擔心！