中環出更:容海恩唔驚負評 繼續獻唱

立法會議員容海恩過往曾多次公開表演吹奏小號,亦曾公開唱歌,網絡上就流傳佢幾年前唱歌片,但網民反應就好壞參半,更畀人大彈男人聲添!但網民批評未有擊倒容海恩,佢尋晚就喺香港專業及資深行政人員協會(專資會)晚宴上大開金口,成功博取台下觀眾掌聲。

容海恩尋晚同專資會成員龐朝輝合唱《只想你會意》,而立法會議員盧偉國就吹色士風伴奏。容海恩唱歌時中氣十足,亦都冇走音,表現相當平穩,但動聽與否就見仁見智喇!其實過去都不時見到容海恩大開金口,佢話除咗晚宴,亦曾去老人院探訪時獻唱,而且唔止唱流行曲,粵曲都難佢唔到,其中男女聲都挑戰過,但效果就一般。

陳帆拎貓紙全程咪嘴

隨後運輸及房屋局局長陳帆亦被捉上台合唱專資會會歌,但由於唔識歌詞而需要拎貓紙,但佢仍然全程咪嘴,果然守口如瓶!但唱到家喻戶曉嘅《獅子山下》時,佢就即刻放膽唱,估唔到佢聲底幾雄厚喎。陳帆透露讀書時曾參加合唱團,所以有唱歌底子,而平日又有跑步習慣,或許因而唱歌時夠氣喇!

卓妮

第一手消息請下載on.cc東網iPhone/iPad/Android/Windows Phone Apps