中環出更：林偉雄撐時尚錶款科技化
香港表廠商會（商會）早前舉行新一屆會董會就職典禮，原常務副會長林偉雄（Enders）升呢接棒做會長，而常務副會長一職就由已故慈善家李惠利嘅外孫高偉國（Tim）升任。Tim身兼就職典禮籌委會主席，當日會場布置花唔少心思，例如設有大型社交媒體電子屏幕，大玩新科技，佢解釋話係想鼓勵業界加強同科技嘅聯繫，尋找新機遇。
講到機遇，Enders就話香港營商環境愈嚟愈嚴峻。首先受到外圍經濟環境影響，買家採購趨向款多量小，再加上愈嚟愈難請人，所以業界應透過社交媒體等新科技建立品牌，推出個人化時尚錶款，以尋求出路。
Tim嘅爸爸高叔平都有到場支持。講起Tim投資瓣數多，咪冇乜時間幫手打理家族鐘錶生意？高叔平就笑稱，依家市道麻麻，個仔鍾意咪由得佢發展吓，至於家族生意就繼續由佢守住先喎。
莫慕潔冀多啲女仔入行
同場仲有商會會董周宛賢、秘書長莫慕潔（Daisy）等靚女。Daisy係全球最大嘅錶針生產商第三代，亦曾獲青年工業家獎。佢話工業界嘅女仔少，希望有多啲女仔入行，因為女仔比起男仔有唔少優勝之處，例如同客戶傾生意時可以發揮女仔柔性嘅長處，唔使下下硬碰硬喎。
啱啱由中華廠商聯合會會董升做常務會董嘅吳國安都有到場，佢話由於遞補機制而獲得「升呢」，雖然任期將於年底屆滿，但佢會積極參選，希望連任喇！
卓妮