立法會有名你叫垃圾會，政客係咩質素，大家心照喇。難得六名反對派政客被法庭掃地出門，簡直係為民除害，大快人心，偏偏港府唔知食錯乜嘢藥，係都要急住補選，隨時一個屈尾十又畀班宣獨辱華政客回籠，咁就捉蟲咯。
嗱，選管會宣布立法會補選將於明年三月舉行，先填補四個議席空缺，至於另外兩個空缺，因為長毛及劉小麗打算提出上訴，要等待所有官司完結先可以再安排補選。好明顯，分開兩次補選不嬲係反對派嘅主張，今鋪求仁得仁，仲唔鬆毛鬆翼咩，之但係港府手指拗出唔拗入，咁就辣（慶）咗一班建制派嘞，正如有人話齋，分開補選勞民傷財，立法會又唔係少咗六個人就開唔成會，點解唔等埋上訴官司完結先合併補選呢？
呢個問題相信亦係唔少市民嘅疑問，莫講話搞一次補選所需嘅公帑動輒億億聲，動員嘅人手更係以萬計，港府開口埋口審慎理財，應使則使，偏偏呢啲冤枉錢點浪費都唔心痛，有冇再離譜啲吖。係人都知，呢六個空缺全部來自反對派，佢哋「在生」時有破壞冇建設，唔係拉布就係流會，唔係宣獨辱華就係搞本土自決，根本就係同主流民意對着幹，補選咪即係畀機會呢班牛鬼蛇神名正言順回魂，港府搬石頭砸自己嘅腳，有冇再愚蠢啲吖。
話口未完啫，反對派就密謀點樣搞亂檔嘞，好似正在坐風流監嘅羅冠聰吖，自己參選無望唔緊要，事關有女友「代夫出征」，繼續男友反中亂港未竟之志；又好似劉小麗吖，話就話計劃上訴，但傳聞已做好「彈弓手」擱置上訴嘅準備，目的係氹港府分開兩次補選，製造兩次單議席單票制補選，咁佢就可以盡快「食神歸位」，最難得係港府密切配合喎。
睇到喇，呢幾年香港社會立立亂，港府施政阻礙重重，咪就係多得反對派政客為反而反，逢中必反囉。最攞命係佢哋滿口歪理，一味鼓吹年輕人違法達義，將罪犯吹捧成英雄，搞到啲大學生有樣學樣，個個以挑戰中央搞港獨為時尚。港府唔係除惡務盡，反而姑息縱容，曲線救「獨」，有人話港府入面大把無間道，唔係冇道理o架。
有心水清人士就講得啱嘞，立法會一定要七十個議員至做到嘢咩？六十四人做唔得咩？再講吖，一日有班政客喺度搞風搞雨，香港一日都不得安寧，立法會點止係垃圾會，直情要改名播毒會喇。講到尾，香港最緊要有新聞自由，最緊要有第四權，旨意一班害人政客監察社會喎，點都唔及傳媒發揮第四權咁靠得住吖！