政情：請柬錯名變「傻賢」 何俊賢話唔介意
網上流傳一張有關香港南區各界十一晚宴活動嘅請柬，根據請柬內容，晚宴活動喺下周五晚上香港仔中心舉行，仲邀請咗唔少政界嘉賓，包括多名立法會議員，例如身兼行政會議成員嘅張國鈞、郭偉強，而其中一位立法會議員就係「何傻賢」。立法會係冇「何傻賢」議員嘅，唔通呢個係舉辦單位對漁農界議員何俊賢（高佬賢）嘅「暱稱」﹖
話博市民一笑係好事
高佬賢回覆傳媒時就話，自己都知道呢件事，主辦單位早已經喺兩、三個星期前打電話向佢道歉，不過佢就唔知主辦單位將佢個名寫錯做咩字。當時佢覺得無傷大雅，橫掂請柬都印咗，要重印嘅話好似唔係咁環保。
高佬賢又強調，唔介意被寫錯名，事關人生總會有錯誤，仲講笑話以後自己多咗個新綽號，都幾得意，如果件事可以博到市民一笑，都係好事喎。睇嚟高佬賢真係有「阿Q精神」喇。其實「傻」字及「俊」字倉頡速成碼相近，相信主辦單位都只係一時打錯字啫。