中環出更：黃靜文離任貿發局 唔急復出
曾出任中華廠商聯合會行政總裁嘅政制及內地事務局前副局長黃靜文（Adeline），上年二月過檔香港貿易發展局出任助理總裁，不過最近極少喺公開場合見到佢身影，原來Adeline喺貿發局只做咗半年，上年八月已離職。究竟咩原因令佢來也匆匆，去也匆匆？
承認有新工搵上門
有個別同Adeline相熟嘅商界人士透露，曾聽聞Adeline呻工作壓力大，亦有人話Adeline因鼻敏感而請辭，基於原因眾說紛紜，當然要搵番當事人了解真相。Adeline接受查詢時大方承認已經離開貿發局超過一年，因為當時深受鼻敏感困擾，喉嚨亦長期唔舒服，經常要睇醫生，所以索性辭職好好休息。
Adeline又狀甚輕鬆咁話，依家未有工作，但工作咁多年，休息多一陣都不為過。未婚嘅佢雖然衣食無憂，始終係叻女一名，按道理應該有人搵佢復出，Adeline承認有新工作搵上門，但都要覺得合適先得。當問及新工係咪包括政府工，Adeline即時停頓咗一下，然後就笑住咁話「唔講呢啲！」
卓妮