香港人出名食得招積，好景嗰陣點止餐餐魚翅撈飯吖，仲話要魚翅漱口添，結果香港成為全球人均消耗魚翅最多嘅地區，仲連累唔少鯊魚就快絕種，都咪話唔殘忍。咪睇家陣保育意識高咗，食翅嘅人少咗，入口量減咗，其實香港人一樣有第二種方法殘害鯊魚嘅咋。
係乜嘢方法？之唔係走私同轉口囉。唔講唔知道，全球逾五成魚翅經香港中轉至其他地區，部分仲係非法入口嗰隻，外國環保組織形容香港為「魚翅之都」就係咁解。淨係今年首兩個月咋，港府已截獲逾一千二百公斤受管制走私魚翅，比去年全年多近二百公斤，就知情況幾咁猖獗。話口未完啫，江門海關又破獲一個特大魚翅走私集團，涉款高達八億元人仔，幕後主腦又係香港人，問你點頂。
話說該走私集團活躍中港兩地超過兩年，集購、運、儲、銷於一身。走私路線都好迂迴，首先喺非洲、南美、東南亞等國家零散採購魚翅，然後喺香港偷龍轉鳳，更換原產地包裝及集運，再以海味乾貨名義運至中越邊境申報過關，最後運返廣州、茂名等地散貨。
即係咁，走私魚翅已經唔馨香嘅喇，殊不知有關集團仲衰到幫魚翅用化學劑加工上色，兼且工場衞生環境惡劣，烏蠅亂飛，臭味四溢，隨時食壞人都似。所以話啫，世界上有咁多好嘢食，點解偏偏要食魚翅喎？魚翅本身冇味，又唔係特別有營養，價錢又貴，將自己口腹之欲建築於瀕危動物痛苦之上，無非都係為咗滿足虛榮心啫，何必呢！
嗱，有網民就講得啱嘞，「冇買賣就冇殺害」，消費者其實先係始作俑者。今次走私嘅魚翅係就係運返內地，內地消費者有最大責任，之但係走私中轉站係香港，幕後主腦又係香港人，香港都係難辭其咎嘅咋。再講吖，香港魚翅消耗量話就話有所下跌，但近兩年都消耗咗近八十噸，唔嘢少o架，香港人大大聲批評內地人食狗肉不文明，咁食魚翅又有幾文明呢？
話時話，香港唔知幾時開始成為受管制物種嘅走私天堂，魚翅固然係一個例子，象牙亦係另一個例子。早兩個月之嘛，本港海關先至破獲歷年最大宗走私象牙案。港府計劃最快二○二二年禁售象牙，但禁售魚翅就遙遙無期，點解唔一視同仁呢？
講起就羞家，香港自詡文明城市，香港人硬係自覺高人一等，其實名不副實，莫講話走私及消耗魚翅全球第一，就連人均垃圾量都冠絕全球。點都好喇，大家係時候改變生活習慣，為保育出多分力，咪有口話人冇口話自己吖。