政情：日游三公里 丁天立弗到漏
立法會前議員丁午壽早前同阿仔丁天立（Kenneth）一齊出席活動，兩父子身形都好弗，唔通佢哋一齊去運動健身？Kenneth就話近期迷上游水，仲話每次游足三公里先上水，結果成功減咗成二十幾磅。
減咗廿幾磅
唔講唔知，原來Kenneth體重曾經高達一百九十幾磅，而自從鍾意咗游水，開始每日騰出約一個鐘頭去操水，每次游足一百二十個塘，以每個塘二十五米計，即係整整三公里，真係少啲毅力都唔得。佢又話早前去咗台灣參加三項鐵人賽事，佢負責游水部分，自問泳技克服到呢次挑戰，但被問到會唔會參加本地嘅三項鐵人賽，佢就話未有考慮，原因係佢跑步唔叻，唔可能只靠游水喎。
Kenneth亦有教仔女游水，不過游水始終比較機械性咁重複同一動作，所以仔女都嫌悶，唔肯陪佢一齊游。咁爸爸丁午壽係咪一齊游所以咁弗呢？丁午壽笑言自己無做運動啦，又話食嘢無乜戒口，但係佢身形仍然咁弗，實在恨死隔籬。