政情：不踩不相識 黃金寶遇民間車神
高手在民間，單車冠軍唔一定只出現喺奧運，分分鐘就喺你左近。前世界單車冠軍黃金寶（阿寶）早前認識一位隱世單車騎士——來自深水埗嘅「重量級」車手雄哥。何謂重量級？因為雄哥喺三十年前起每日踩單車運送多支石油氣，殊不簡單。
試踩500斤大氣車
貴為冠軍車手，阿寶喺鏡頭外對民間車神雄哥嗰部經特別改裝嘅單車極感興趣。原來雄哥部單車已有五十年歷史，單係單車本身已經重逾一百二十斤，再加上七支「大氣」（石油氣），單車負重近五百斤。對於平日踩慣炭纖維輕身公路單車嘅阿寶嚟講，就算見慣大場面，都要花啲時間先能夠掌控。
阿寶同雄哥嘅共通點係單車，而造就亞洲車神同民間單車高手喺街頭相遇嘅事，當然亦係同單車有關，事關佢哋係為「新鴻基地產香港單車節」拍攝短片。雄哥更喺短片中形容送石油氣係好孤獨嘅生活，阿寶則感嘆香港地臥虎藏龍，同時亦順勢邀請雄哥一齊參加十月八日嘅單車節活動。