政情：劉小麗疑扮上訴圖搶游蕙禎空缺
因應有六人被取消立法會議員資格，補選勢在必行。由於被取消資格嘅青年新政游蕙禎、劉小麗同屬九龍西；而青年新政梁頌恆同社民連梁國雄（長毛）則同屬新界東，若兩席合併補選會對泛民不利，故長毛同劉小麗均決定提出上訴，以阻止合併補選。據聞，提出上訴只係民主派令政府分開補選嘅策略，有消息傳出，指劉小麗根本無意上訴，有機會喺政府公布分開補選之後，便「彈弓手」向法庭申請擱置上訴，節省訟費之餘，兼且製造兩次單議席單票補選，佢可以盡快出戰九龍西補選，取回席位。
游蕙禎及梁頌恆舊年被褫奪立法會議員資格後，羅冠聰、長毛、姚松炎同劉小麗亦相繼被取消議員資格，分布喺九龍西、新界東、香港島等地區直選及建築界功能界別合共六個議席將進行補選。隨着長毛同劉小麗就議員宣誓案提出上訴，政府好大機會分開兩次進行補選，即先填補九龍西、新界東、香港島及建築界議席，待長毛同劉小麗嘅上訴程序結束，再安排另一場補選填補餘下另外嘅新東同九西議席。
據聞，早前因為訟費而躊躇嘅劉小麗除咗獲「守護公義基金」同民主派議員資助訟費外，更有人獻計，倡劉小麗先提出上訴，當政府正式公布四席補選日期後，便向法院申請擱置上訴，以免一旦敗訴要支付巨額訟費，而劉小麗之後會再次披甲出戰游蕙禎被取消資格嘅九西補選。至於有法援資助嘅長毛，就唔使擔心，可以同政府打到底。有民主派人士透露，以上方案都係初步提出，要等民主動力下星期開會，向劉小麗詳細解釋先可以落實。
泛民為補選制訂後備方案
雖然話被取消議員資格嘅人喺民主派機制中有優先參選權，但亦有人擔心政府會以確認書阻止佢哋參加補選。據了解，已經有民主派政黨提出後備方案，建議民主派初選出「Plan B」人選，以便隨時補上。目前九龍西嘅「Plan B」人選就有民主黨袁海文、公民黨余德寶同民協老將馮檢基；至於新界東就係新同盟范國威、中大學生會前會長張秀賢同前議員鄭家富。
民主派方面大玩「彈弓手」、「攻心計」，建制派方面亦有暗湧。本身各大黨早已協調好由民建聯深水埗區議員鄭泳舜出戰九西補選，但有傳另一深水埗區議員、自由黨嘅李梓敬亦有意落場，若最後未能成功勸退李梓敬，或需要搵另一個區安置佢，若果建制派協調唔到，咁吸盡本土同民主派票嘅劉小麗就會勝算大增。