中環出更：廖振新避嫌 村屋農地業權轉畀家人
發展局副局長廖振新申報喺元朗擁有一間村屋同一片農地約一成七業權，惹嚟囤地疑雲。佢尋日出席傳媒茶敍時承認自己官職敏感，所以間屋同塊地完成相關手續後，會傾向將業權統統轉畀兄弟姐妹，以釋除公眾疑慮。
黃偉綸為城規會解畫
原來今次嗰間村屋同塊佔地成萬呎嘅農地，係廖振新細個時同屋企人嘅住所嚟，佢同另外五名兄弟姐妹都住喺入面，而廖父會喺農地種白菜同菜心，佢同兄弟姐妹都會落田幫手添！由於間屋同幅農地都係廖父嘅遺產，廖振新話完成所有遺產繼承手續後，佢個人傾向會將業權轉畀屋企人。
另外，同場曾經擔任新聞處處長嘅發展局局長黃偉綸，重返「老巢」海港政府大樓新聞處，似乎難改多年習慣，一開口即刻講「我哋新聞處」，搞到全場大笑，佢亦即刻改番話係發展局。席間有記者投訴城規會採訪安排差，擔任過城規會主席嘅黃偉綸就幫口解畫，解釋會議室細所以安排唔到傳媒入場，又話圖則大難放上網，睇嚟黃偉綸做新聞處嘅技巧毫無生疏。
卓妮