中環出更：梁紀昌都曳過水彈專掟拍拖西裝友
每個人細個都總會做過曳事，鮮魚行學校前校長梁紀昌尋日出席「2017香港品格日」啟動禮時就講起，自己童年只係做過一件壞事，就係七、八歲去探親戚時，試過跟住其他人掟水彈落街，仲要專揀拍拖嘅「西裝友」做目標，因為當時唔抵得人哋咁有錢，其實掟嗰吓都知自己唔啱，所以都只係曳過一次，整個童年都好乖，因為媽媽有特別方法令佢唔想曳添！
梁紀昌話媽媽喺佢細個嘅時候，不停讚佢「昌仔好乖」，令佢覺得唔想曳，所以細個又會幫手煮飯同湊細佬妹。時至今日，梁紀昌從事教育工作咁多年，佢話教小朋友最重要就係根據事實去讚，否則小朋友會知你講大話。
品格日係由品格教育協會主辦，而創會主席就係港鐵主席馬時亨嘅大女劉馬露明，佢丈夫、放射科醫生劉仲恒都有嚟支持，佢都講起細個讀港大，宿舍樓下係墳場，試過有啲樓友會掟一卷卷廁紙落去，又試過有啲樓友夜晚入墳場打BB彈槍，覺得佢哋係專登去練大膽，但佢就唔敢去嘞！
劉馬露明帶學生探訪露宿者
劉馬露明就話教小朋友最重要係大人要做好榜樣，同埋要帶佢哋去多啲地方了解其他人係點，例如佢都會不時帶學生去探訪露宿者同老人中心等，至於今年品格日嘅主題係「選擇善良」，亦想帶出一個訊息係幫人唔一定要去啲特別嘅地方，而係日常生活都可以幫到人。
基督教正生書院校長陳兆焯都有出席活動，佢講起社會環境可以造就一個人嘅善良，自己同學生嘅相處，係從來都唔會覺得學生唔好，因為每個人都有好嘅一面，只係可能未表現出嚟，或者係因為保護自己，不過當你對佢好，對方亦會好似傳染病咁對番你好o架啦！
卓妮