香港大學畢業生被稱為「天子門生」，大把機構爭住請，可惜今時唔同往日，已經冇呢支歌仔唱。國際機構公布全球五百間大學畢業生就業能力排行榜，結果港大排名第二十，較舊年再跌兩位之餘，仲被首次躋身全球十大嘅內地一級學府清華大學拋離九條街，簡直情何以堪。
堂堂香港龍頭大學，點解會淪落到今日咁嘅田地？鬼咩，政治入侵校園，學生有書唔讀，終日醉心街頭鬥爭，而且要幾暴戾有幾暴戾，要幾激進有幾激進，連港大校董會主席都敢郁，係僱主都怕怕啦。大家應該記得，之前港大委任副校長鬧到沸沸揚揚，嗰位前任學生會會長違反保密協議，大爆校委會會議內幕，當時聽聞就有僱主將佢列入「黑名單」。咁又係吖，你請個員工返嚟，結果佢唔係鬧番僱主轉頭，就係一個屈尾十將公司機密爆畀競爭對手，到時盞養狼狗，咬心口嘅咋。
講開大學生搞政治，港大認第二冇人敢認第一。喺「戴妖」「違法達義」旗幟嘅帶領下，港大學生成為違法佔領嘅中堅力量，而港獨歪風氾濫成災，追源溯始，亦係港大學生刊物《學苑》文章最先提供「理論基礎」。計功夫茶話齋，今次調查如果唔係排名就業情況，改為排名「街頭鬥士」又或者「反骨仔」培訓，港大肯定領先全球。
政治入侵校園，就好似癌細胞擴散咁，由港大蔓延到其他高校，最得人驚係部分後生仔以為自己真理在手，就目空一切打橫行。好似中大學生會咁，港獨旗幟同標語被移除，佢哋冇反躬自省不特止，仲大興問罪之師，對校方人員篤口篤鼻大呼小喝，唔知嘅仲以為紅衞兵批鬥老師。仲有嗰位狂罵「支那人」嘅前學生會會長，兇神惡煞，仲衰過街頭蠱惑仔，你係老闆，敢唔敢點呢挺員工做嘢吖。
不過話又要講番轉頭，僱主對香港大學生敬而遠之，你估學生又好恨打你份牛工咩？依家啲後生仔搞政治，只要夠出位夠吸引眼球，一樣風生水起，前途無量，使乜辛辛苦苦死讀書。有辦你睇，之鋒哥連「廁所」兩個字都寫錯，但咁又如何？美國佬一樣睇得起，封佢為「思想家」，頭上光環巉死人，連「坐政治監」都風流過人，大把尊貴議員排住隊去「朝聖」，人哋玩吓手連諾貝爾和平獎都有機會攞。正所謂，燕雀安知鴻鵠之志，「革命家」嘅情懷你識條鐵咩？
所以話，「萬般皆下品，唯有讀書高」呢句說話已經out咗，改做「萬般皆下品，唯有搞事高」就差唔多。