政情：保住金主要緊李卓人死撐郭紹傑
被指係佔領行動幕後黑手嘅壹傳媒黎智英（漢奸黎），期間儼如佢「私人保鏢」嘅郭紹傑上個月畀港九拯溺員工會踢走之後，唔單止向工會上訴兼出信要舉行特別會員大會。正當工會頭痕之際，職工盟公務員工會委員會日前出聲明力撐郭紹傑，批評番自己嘅工會之前發嘅聲明有誤導公眾嘅成分。睇見職工盟內訌，但身為秘書長嘅李卓人都唔理，唔通因為收過漢奸黎秘密捐款，所以要保住「金主」嘅人？
郭日夜貼身護漢奸黎
喺康文署做公務員救生員嘅郭紹傑三年前工傷病假期間，適逢佔領行動爆發。佢就去咗金鐘佔領區做糾察長，仲要日夜貼身保護漢奸黎，期間多次「勇武」出手，畀同行同公眾質疑佢嘅行為係咪違反公務員政治中立。去到今年八月中，港九拯溺員工會就出聲明，話佢高調參加社會運動，違反公務員政治中立嘅原則，引起會員不滿，同埋多次未經批准聲稱工會代表接受傳媒訪問，經過理事會商議，決定「永久刪除佢嘅會員資格」。
然而郭紹傑反擊，上星期四喺社交網站Facebook貼文，話會章無「永久」刪除會籍呢回事，又話根據會章，佢可以上訴，再召開會員大會或者特別會員大會投票表決理事會嘅決定，仲話要工會喺本周五畀書面回覆，否則唔排除採取法律行動。
工會內部人士就話聲明嘅內容係有唔妥嘅地方，但踢佢出會絕對係理事會大多數嘅共識，原因係好多會員都唔滿意佢嘅「鮮黃色」政治立場，話之前加入工會係想爭取勞工權益，唔係搞政治運動，加埋佢工傷期間日日佔鐘，令到好多人對救生員投以鄙視嘅眼光，有人仲講明佢做工會就唔參加，「如果佢有影響力或者有會員支持，就唔會舊年連理事都選唔到啦！」
工會內部人士又話，郭紹傑嘅上訴確係令工會處於兩難嘅局面，話唔係唔想開會員大會，而係慣例係每年十二月頭先開，無理由為咗佢一個人嘅事，提早舉行大會或者開特別大會，但又唔想件事愈拖愈長，搞到工會愈嚟愈多爭議聲。
聲明引發職工盟內訌
呢邊火頭未撲熄，嗰邊火頭又起。公務員工會委員會日前發聲明，話拯溺員工會錯誤理解「公務員政治中立」，有誤導公眾嘅成分，要以正視聽喎，搞到部分理事好無癮，覺得一個原來做統籌嘅平台，唔應該干預工會嘅內部事務。咁當然啦，工會內訌事小，搞到「金主」嘅人事大，李卓人又點會唔知孰輕孰重呢？