中環出更：內地酒店驚揭衞生差名人冇有怕
早前有內地民間機構對北京嘅酒店進行調查，發現酒店冇喺住客退房後更換床上用品，而洗手間亦被指清潔不足，引起社會討論。卓妮早前見到唔少需要到內地公幹嘅名人，但佢哋就不約而同話唔驚喇！
張益麟：揀新落成酒店
當日為香港貿易發展局主辦嘅香港國際時尚匯展，吸引唔少名人到場觀摩。從事紡織成衣業嘅香港青年工業家協會副會長張益麟話，多數去歐洲同日本公幹，而佢嘅廠房就主要設喺廣東，所以就算去內地公幹都多數即日來回，較少機會需要入住內地嘅酒店，難怪佢唔覺得擔心喇！咁有乜嘢揀舒適酒店嘅心得呢？佢就話着重酒店方便同整潔，所以多數會揀新落成嘅酒店，認為較有保障同整潔咁話。
陳振邦：地氈致鼻敏感
不過，商務及經濟發展局副局長陳百里就話，冇揀酒店嘅心得可以分享，咪以為吝嗇其特別心得，只係佢去親旅行時，都將揀酒店嘅工作交由太太負責，佢仲笑稱自己最緊要找數添！
同場仲有莎莎女婿陳振邦，佢話會挑選住開嘅酒店，自己仲會特別留意洗手間嘅潔淨程度。另一方面，佢仲話酒店房間多數鋪設地氈，可能因為地氈嘅灰塵問題，令到佢住酒店嘅時候經常鼻敏感發作。
菁英會理事盛品儒都話會選擇住開嘅酒店，加上往內地公幹多數去北京同上海，其中去上海時更會返屋企住，所以更加唔使擔心內地酒店衞生問題。佢就指出酒店衞生問題不止出現於內地，但就認為挑選名牌酒店就毋須太擔心咁話。
卓妮