港產官僚冇嘢叻，最叻就係吹水唔抹嘴，講咗當做咗，好似家陣潮流興電動車，當局鼓勵提倡口惠實不至，甚至連最基本嘅舊電池回收，政策居然仲係一片空白，簡直笑大人個口！
電動車電池一般有五到七年壽命，換句話講，本港嘅電動車正陸續進入電池更換期，但大家可能唔知，呢啲電池雖然夠鐘收工，但仲有最少七成儲電容量，外國好多地方都會回收重用，內地亦有唔少民眾用嚟家居發電，慳番啲電費，反觀港府，翹埋雙手關人個關，拍拍籮柚將之當廢物運去外地就算，如果直接進入堆填區，你話幾咁罪過吖。正如「東方報業民意調查」顯示，大部分受訪者批評港府政策有前無後，甚至帶頭製造浪費。
好一句「有前無後」！電動車電池回收問題，其實唔難解決，政府立例規定舊電池剩番若干儲存容量必須重用，推出稅務優惠，又或者好似之前有人建議咁，利用退役電池為蒲台島供電，都不失為可行方案，可惜呢啲都係對牛彈琴，官老爺以為坐喺冷氣辦公室裏面，大筆一揮簽份文件引入電動車就可以收工大吉，睬你都有味喇。
第樣唔講，淨係叉電呢吓嘢已經夠令車主頭痛。依家街度大概有逾萬部電動車，平均七部車爭一個公共充電車位，當中仲要相當一部分係俗稱「慢叉」嘅標準充電器，叉一粒鐘行得嗰十零公里咁大把，屯門出轉市區都未夠，咁鬼唔方便，試問點鼓勵人轉用電動車？
世界潮流浩浩蕩蕩，順之者昌，逆之者亡。電動車已經係不可逆轉嘅大趨勢，法國同英國相繼宣布從二○四○年起全面禁售汽、柴油車；作為傳統汽車大國嘅德國更加進取，計劃二○三○年前禁售。至於香港，時間表、路線圖欠奉不特止，港府仲要走回頭路，取消電動私家車首次登記稅全數豁免，變相逼車主用番汽、柴油車。不可不知，隨着電動車全面取代傳統汽車，後者嘅產量只會逐步減少。不妨打個譬喻，當全世界人都轉晒智能手機，你仲用緊「水壺大哥大」，莫講話out到冇朋友，壞咗都搵唔到師傅維修喇！
一節知則百節見，港產官僚對回收電動車舊電池闊佬懶理，旨意佢哋扶助業界，真係蚊都瞓蛇都死。港府年前係威係勢，豪擲十億元搞「回收基金」，點知因為審批程序過分繁複，批出數字一直未如理想；最近內地實施新禁令，拒收廢膠廢紙等「洋垃圾」，港府一樣坐咗喺度，基本上乜都幫唔到手。大部分受訪者狠批港府搞環保寸步難行，政策虎頭蛇尾，咪就係咁解囉！