政情：龐愛蘭骾骨 唔信古法醫得

沙田區議員龐愛蘭舊年換咗個髮型之後睇落後生咗好多，望真啲佢皮膚仲相當唔錯，原來佢話細細個嘅時候媽咪就好鍾意逼佢哋食魚，最初佢食到喊咁滯，後來大個習慣咗，反而每餐冇魚食就唔安樂，唔知係咪因為咁皮膚都好啲。佢仲笑言有次喺內地做嘢嗰陣食魚骾到骨，啲人係咁叫佢吞一啖飯、飲水又飲醋，但佢就唔係好信呢啲古法，驚陣間愈整愈衰，所以放棄下晝行程都要即刻衝返嚟香港嘅醫院搵醫生求救喎。