政情：胡炎松三更半夜撞「殭屍」

改良水車 借拍落雨戲

胡炎松屋企本身做開建材、油漆同租賃生意，而佢哋喺西貢就有片場出租，講起有次有劇組同佢哋講想要拍攝落雨場景，佢哋就諗到可以運用平日建築時都會用到嘅水車嚟製造落雨效果，仲將水車不斷改良，久而久之成為好多劇組常用嘅重要工具，電影全盛時期佢哋十幾部水車會畀人租晒嚟拍戲。

講開依家係農曆七月，片場咁多年嚟有冇靈異傳說，佢就話片場夜晚都有人拍戲，所以還好，但就憶起當年好奇試過半夜跟已故藝人林正英等人上九肚山拍攝，行行吓見到副棺材，之後有幾個着住殭屍衫嘅人喺森林走出嚟，都咪話唔驚。佢又指當時拍攝相當認真，佢哥哥特製咗成張枱咁大把風扇營造大風吹起啲樹葉嘅效果添！