政情：回水大限就到 游蕙禎拖字訣想賴數？
青年新政游蕙禎同梁頌恆因舊年立法會宣誓時播獨同辱華風波，被法庭裁定取消議員資格，而佢哋喺上月底嘅「終極上訴」亦告失敗，喪失議員資格已成定局。立法會秘書處隨即向佢哋追討已申領嘅議員薪津，並要求佢哋喺聽日或之前回水。大限將至，游蕙禎尋日冇正面回應係咪回水，仲話將去信立法會秘書處查詢要求還款嘅法律理據。拖到限期前夕先問，係咪想賴債唔還？
立法會秘書處早前向游、梁二人發出最後通牒，追討合共約一百八十六萬元，即每人約九十三萬元嘅議員薪津，包括每人每月約九萬五千港元嘅薪酬，同埋每人約八十三萬元嘅辦事處營運開支津貼。
將去信立會 了解還款理據
回水限期聽日就屆滿，但游蕙禎尋日出席論壇後話呢個星期將回覆立法會秘書處嘅信，內容係查詢要求還款嘅法律理據。佢仲話要了解當中嘅詳情，先會再決定下一步行動。被問到係咪打算唔還錢，游蕙禎冇正面回應，但就話已用咗部分薪津買器材，仲透露話喺搬出立法會辦公室時，曾經打算向立法會秘書處還番啲器材，不過佢就話，對方當時話「唔要呢啲嘢」。跟住佢仲話睇唔到有乜嘢法律理據，需要佢哋咁樣還錢。
除咗薪津，仲有官司嘅巨額訟費。早前佢哋估計需要支付約一千二百萬元嘅訟費，而佢哋亦都講到明如果負擔唔到訟費，或會申請破產。唔知今次佢哋向立法會秘書處查詢法律理據，係咪又想拖延回水呢？
談實現港獨 「慢慢睇吓點囉」
另外，游蕙禎喺論壇上又批評政府漠視年輕人聲音，甚至睇小年輕人嘅能力。同場嘅民建聯荃灣區議員林琳就覺得唔應該脫離現實，仲話要考慮啲訴求係咪喺現實中可行，唔可以太天馬行空。游蕙禎就反駁，話年輕人係覺得生活受影響而走上街頭，強調佢哋唔係只談理想。林琳聽完隨即反問游，「港獨就係有可能會發生嘅現實咩？」游蕙禎只回應「大家咪慢慢睇吓點囉」。