中環出更：郭偉強甜品傳情 要老婆「Tiramisu」
情侶之間通常都會有啲獨特暗語，有啲仲要係兩個人自創，只有佢哋先會明。立法會議員郭偉强就自爆同老婆嘅獨特暗語，不過佢就話唔係自創嘅，仲要係同甜品Tiramisu有關。
意思係「帶我走」
郭偉强解釋，話「Tiramisu」嘅意思係「Pick me up」，即係「帶我走」嘅意思。佢話最初對住老婆講嘅時候，老婆仲理解錯，以為佢講緊甜品「意大利芝士餅」添，仲應佢話「好飽喇唔食喇」。眾所周知唔同嘅花有唔同花語，例如玫瑰花就代表愛情嘅意思，勢估唔到，原來連甜品名都有意思添！
講開又講，佢同老婆一齊為囝囝改英文名叫「Antonio」，佢覺得呢個名好似幾浪漫咁喎，仲話好多街坊都大讚囝囝靚仔，有見及此，佢依家已開始會對住囝囝說教，提醒佢大個仔拍拖唔好「一腳踏兩船」喎。唔知依家先一歲半嘅Antonio，又聽唔聽得明佢爸爸講乜嘢呢？
卓妮