中環出更：60年嚟首下廚 蕭偉強學整月餅
下個月就係中秋節，今年有團體發起手作月餅活動，為近日受颱風影響嘅長者送上溫暖。勞工及福利局前局長蕭偉強尋日出席活動時，就親自為長者製作以芝麻為餡料嘅綠豆月餅，但月餅就唔太「見得人」，連蕭偉強自己都笑笑口咁話啲月餅整到好似「黑松露」咁樣，希望同場嘅立法會前秘書長吳文華（Pauline）可以多多指教喎。
被問到離開政府「熱廚房」之後有冇親自下廚，蕭偉強突然自爆六十年來都從未試過親自下廚，平日都要靠家傭落手煮飯，就連太太都係「無飯主婦」唔會下廚，所以今次要親自製作月餅都有啲擔心。
當大家都準備就緒之際，Pauline就邀請蕭偉強及熊貓義工隊榮譽隊員陳嘉容同枱製作月餅，但蕭偉強就未熟點樣用啲模具，唔小心將啲綠豆擠咗出來，之後更加將啲芝麻搓到出晒界，搞到啲月餅餅皮出現黑色「斑點」，連佢自己都笑笑口話啲月餅嘅賣相就好似「黑松露」咁樣，仲盛讚陳嘉容整得好好添！呢個時候，Pauline亦都講笑咁話「你（蕭偉強）六十年唔做嘢，我就做足六十五年」，難怪望一望啲月餅就高下立見啦！之不過，眼見各位咁有心，相信長者們收到月餅都會覺得好溫暖，唔會介意月餅嘅賣相。
吳文華退休搞康復者社企
Pauline尋日就帶埋一家大細到場製作月餅，並分享自己退休後嘅生活。佢卸任立法會秘書長之後，就成立咗一間專門聘用殘疾人士同情緒問題康復者嘅社企（we60.com），幫手營運一個為退休人士而設嘅資訊網站，員工除咗要做資料搜集之外，就連撰稿同翻譯都要一手包辦，認真唔簡單。佢又透露，平時星期六、日都會同屋企人去飲茶休息吓，尋日整完月餅仲會一齊去食海鮮添！
卓妮