內地官場以前腐敗成風，各級官員打着開會、學習、交流等冠冕堂皇嘅旗號遊山玩水，大吃大喝，但隨着當局打貪反腐，氣象已煥然一新，反而自詡廉潔嘅香港竟然好學唔學，將內地官場腐敗一套學到十足十，簡直眼冤。
呢，灣仔民政事務處喺暑假期間舉辦「京都美學文化之旅」，咪就係借外訪考察之名，行揮霍享樂之實嘅典型例子囉。呢個五日四夜交流團，美其名曰讓本港青年赴海外交流，但其實掛羊頭賣狗肉，整個行程真正同當地大學交流只有兩粒鐘咁大把，其餘時間吃喝玩樂，仲可以浸溫泉歎貴價料理，全部公帑埋單，怎一個爽字了得。
正所謂，一分錢，一分貨，玩得咁盡興，皮費當然唔輕喇，民政事務局話喎，團費開支平均每人近一萬六千元，全團二十名團員及兩名政府官員嘅總開支約三十五萬元，比市面一般五天日本團足足貴近一倍，話唔係超級豪華團都冇人信。最難頂係，該局聲稱出訪目的係讓灣仔區青年從歷史、文化、藝術多方面了解京都審美標準，同時讓團員藉着活動見識日本人將垃圾分類，令佢哋反思生活喎。喂，大嗱嗱幾十萬公帑學習審美標準同垃圾分類，名額得二十個，有冇再奢侈啲吖！
講真，咁筍嘅交流團，想報名嘅肯定由旺角排到沙頭角，到底點先可以參加呢？嗱，該局淨係話活動由灣仔區青年活動委員會合辦，但點樣報名同遴選，當局就諱莫如深。至於公帑到底以乜嘢名義撥出，一樣係糊塗帳。大家淨係知道局方轄下有個「國際青年交流計劃」，撥款年年增加去到億億聲嗰隻，至於今次京都豪華團係咪由呢個計劃撥款，局方就打死都唔肯透露，呢啲咪欲蓋彌彰囉。
最可圈可點嘅係，今次隨團包括灣仔區民政事務專員陳天柱及一名聯絡主任，話就話負責聯絡及照顧團友，講到任重道遠咁款，但據有份參加嘅團友爆料，呢兩名官員連日行行企企，陪食陪玩陪洗溫泉浴，不知幾咁梳乎，而且陳天柱正正係前教育局局長吳克儉嘅政務助理，大家都知「旅遊局長」臨落台都飛到最後一分一秒，又最鍾意睇日本紅葉同短裙學生妹，政務助理咁貼身，喺前局長身上學埋咁多遊埠真本領，家陣派上用場又有乜出奇。
一件污，兩件穢，今次事件恐怕只係冰山一角咋，到底仲有幾多腐敗團未被揭發，真係唔敢想像。都係古人講得啱，上有好者，下必甚焉，港府高官其身不正咯喎，地區官員梗係有樣學樣喇，唔通真係要請中紀委南下調查，班港產官僚至識驚？