政情：陳帆唔執輸 3.5萬蚊請人打網絡戰
財政司司長陳茂波上個月豪花逾十萬港元，聘請兩個人幫手搞網誌同Facebook（Fb），做好網絡宣傳工作。運輸及房屋局局長陳帆亦不甘後人，喺今個月透過公務員事務局刊登招聘啟事，聘請一名月薪三萬五千港元嘅研究主任，為運房局管理社交媒體平台，以及監察與運房範疇相關嘅新聞。莫非係因為民主派打算透過網絡宣傳嚟拉倒一地兩檢，所以陳帆急急出招，請番個研究主任幫手反擊？
疑爭取民意撐一地兩檢
民主派早前已表明會用盡一切辦法阻止一地兩檢方案，甚至透露會喺唔同社區擺設街站，甚至「打網絡戰」，喺網上平台上反對一地兩檢嘅理據，務求爭取更多民意支持。可能連陳帆都擔心民意逆轉，局方本月初就開始招聘一名月薪三萬五千港元、主理社交媒體的研究主任。
呢個職位主要係幫運房局搞Fb、寫演詞、搜集資料，同埋監察相關範疇嘅新聞，不過求職者就最少要有五年傳媒或相關經驗。睇嚟陳帆想搵幫手幫政府「助攻」，抗衡民主派嘅網絡攻勢喎。