政情：長毛劉小麗上訴阻補選唔益建制派
社民連梁國雄（長毛）、香港眾志羅冠聰、自決派劉小麗（小麗）及建築界姚松炎，因為在宣誓時「加料」同「玩嘢」而被取消議員資格嘅案件，上訴限期將於下周一屆滿。消息指出，其中長毛同小麗已決定會上訴，最快今日公布。
由於與長毛同屬新界東嘅青年新政梁頌恆，以及與小麗同屬九龍西嘅青年新政游蕙禎，早前已被拒提出終極上訴，如果長毛同小麗唔提上訴，政府就會安排新東兩個議席空缺同九西兩個空缺一齊進行補選，喺比例代表制下，建制派幾乎肯定可喺兩區各取一席。今次長毛同小麗決定上訴，主因正正係想迫使政府將有關議席分開補選，避免令建制派得益。
捐一個月人工 泛民議員唔制
據了解，其實劉小麗本身並無強烈意願上訴，原因之一係擔心一旦上訴失敗要支付巨額訟費。期間有人曾提議由全體民主派立法會議員各捐出一個月議員酬金、即每人約十萬元資助兩人上訴，但有部分議員有保留。民主派尋日開會後，決定由每人硬性捐款十萬元，「減價」為民主黨、公民黨、專業議政及其他「單頭」議員各捐四十萬元，即合共一百六十萬元訟費，小麗最後亦答應提出上訴。