政情：雙學東北16子倒貼贖「信」捉晒蟲

其實喺十六子判監開始，民主派已鋪天蓋地叫人寄多啲信畀在囚嘅社運人士。好似喺赤柱監獄服刑嘅黃浩銘就曾抱怨入獄後一封信都收唔到，早前更主動呼籲，外面嘅朋友要多啲寫信畀佢解悶添！消息甫出，啲信就排山倒海咁寄到監獄，黃浩銘照道理應該開心到瞓唔着，但連日來寄信嘅朋友唔知係幫佢定玩佢，啲信件竟然郵資不足，搞到佢要用獄中嘅工資嚟補番差額。咁搞法，真係分分鐘吸乾佢份人工。

最少兩封欠逾＄11 要義工幫手

原來黃浩銘只係冰山一角。有份協助收集信件嘅社運人士葉寶琳，尋日亦喺社交網站Facebook上載圖片，公告近日最少有兩封信件拖欠逾十一蚊郵資，搞到義工要專登去郵局畀錢先可以贖番封信，並藉此呼籲寄件者「請比（畀）足郵費」，否則來來回回會延誤在囚嘅社運人士嘅收信時間，仲希望網友將訊息廣傳喎。呢次真係甩晒轆喇！

老實講，呼籲寄信畀十六子，一來係為佢哋解悶，二來係為想畀佢哋收風，了解出邊發生乜嘢事？本報日前就踢爆泛民濫用「公務探訪」制度探監，不斷派議員進行公務探訪，乘機為佢哋解悶兼畀佢哋放風，分享佢哋喺獄中嘅所見所聞，甚至繼續宣揚違法抗命，被外界炮轟坐風流監。

泛民早前更發起設立基金眾籌，為在囚十六子提供津貼，月收一萬蚊，被外界批評係「安家費」，既然有呢筆「安家費」，又使乜擔心要補貼郵資扣人工吖！