中環出更：黃錦星「一年打一次呔」寸張建宗？

政務司司長張建宗曾自爆話自己每日上班前，對住鏡子繫領帶會感到興奮。不過同樣作為「熱廚房」一員嘅環境局局長黃錦星就話，每年只會喺七月一日出席官方活動時先會打呔。唔通佢寸緊張建宗？

黃錦星同張建宗尋日一齊出席同時裝業有關嘅會議，佢哋喺致詞時都提及，希望相關業界亦能推動環保同可持續發展。黃錦星話現時其他地方為推動環保會呼籲官員如非必要都唔着外套或打呔。佢除咗自爆一年先打一次呔外，又話會減少喺辦公室內開啟冷氣，以減低碳排放量。

佢又話香港每日有三千噸廚餘、三百噸衣料廢物，而港人每人平均每年棄置一百件衣服。佢認為港人即使喺每星期棄置一件衣服，亦已響起警號，希望港人改變衣、食、住、行方面嘅習慣，推動環保同可持續發展。

而張建宗就話政府會為推動環保同可持續發展，提供資助同平台，希望能推動官、商、民合作。呢次活動係以可持續發展時尚為題，所以兩位官員喺致詞時均提及環保，並希望製衣商能夠喺生產時減少污染，例如碳排放同水污染。

卓妮

中環出更：黃錦星「一年打一次呔」 寸張建宗？