中環出更：買錶講究點襯衫 周雪：搞搞震款式最受歡迎
全球最大嘅香港鐘表展早前喺灣仔會展登場，今年市道氣氛仲未全面復甦，想突圍而出都要諗吓新賣點。近年愈嚟愈興做時款手錶，方便貪靚嘅人玩配搭。香港鐘表業總會副主席蔡宗富就搵日本人氣粉筆畫家合作設計新系列，又設計咗一個錶面係鏢靶嘅手錶，增添唔少玩味。
做時裝生意嘅「歐洲時裝女王」周雪（Eva）同佢老公邱家銘都有入場，Eva喺佢旗下時裝店賣埋蔡宗富出產嘅腕錶，吸引唔少人喺買衫時順便買錶配襯，Eva笑稱愈係「搞搞震」嘅錶款設計愈受歡迎添！
林俊杰趁機搞飯敍
來港參展嘅仲有台灣區鐘錶工業同業公會理事長唐昇平，以及港澳台灣慈善基金會副主席林俊杰等台灣幫，林俊杰仲趁鐘表展期間搞咗一場兩岸三地業界翹楚飯敍，廈門市鐘表協會會長黃愛英都有出席。林俊杰話希望業界多啲交流，睇吓可唔可以擦出新火花。
錶界年度盛會又點少得保良局總理鄧宣宏雁同老公鄧鉅明，佢哋啱啱送細仔去英國讀書返來。最近英國簽證大塞車，導致好多香港學生錯過開學時間，鄧太話好彩佢六月已幫囝囝申請簽證，所以冇受到影響。
囝囝首次離開父母身邊，鄧太直言好掛記，前一晚等個仔電話等到半夜三點添！不過鄧鉅明就笑稱，阿仔唔喺身邊「好正」，因為太太就可以用所有時間同精力照顧佢，兩人又可以過番拍拖時去酒店聽歌、行超市的日子喎。
卓妮