香港樓價冠絕全球，港人要唔飲唔食十八年先至買到一個豆腐膶咁細嘅單位，你話幾咁悲哀吖。嗱，港府高官放聲氣話會喺施政報告推出「港人首置上車盤」，助年輕人安居，聽落係威係勢，但做唔做得到根本冇人話得埋。
高官係咁講嘅，「港人首置上車盤」嘅對象必須係香港永久居民、從未置業、相對年輕嘅家庭，而為咗唔影響公屋供應，選址方面盡量唔會同《長遠房屋策略》用於興建公營房屋嘅土地相撞，即係會另覓土地喇，售價方面就未有定案，但講明單位屬上車盤，售價必定較平，限制亦會較多，當局仲話好有信心買家將來改善收入就可以喺私人市場置業喎。
公道啲講句，呢個計劃出發點真係唔錯，家陣嘅年輕人之所以咁大怨氣，動輒上街反政府，好大程度就係無法向上流所致，如果解決咗住屋問題，怨氣自然少咗大半，社會都會和諧啲。之但係出發點正確係一回事，做唔做得到又係另一回事。既然港府講明唔會郁現有公營房屋用地，咁即係要另覓土地，係人都知港府呻冇地可用呻到樹葉都落，如果覓地真係講咁易，房屋問題就唔會搞極都搞唔掂喇。
嗱，尋日「土地供應專責小組」第一次開會，講到本港土地供應最少相差一千二百公頃，目前已掌握十二項土地供應選項，小組會探討各選項利弊，明年第三季交報告喎。睇到喇，下年底先至有報告，搞得嚟蚊都瞓蛇都死，何況生地變成熟地唔可能一蹴而就，建屋亦需要時間，冇十年八載都唔成事，首置上車盤計劃到真正落成發售都唔知係何年何月嘅事，即係叫人望梅止渴啫。
再講，如果首置上車盤只係象徵式起嗰一兩幢，一樣係嘥氣嘅咋。唔係咩，歷屆政府都話要協助港人置業，擺出雄心壯志嘅模樣，淨係資助房屋已經花款多多，一時居屋，一時綠置居，上屆政府仲話起青年宿舍添，講到天花龍鳳，結果房屋問題不單止冇紓緩，仲愈演愈烈。好似最近推出嘅新居屋，單位得嗰二千零個，超額申請四十幾倍，中籤仲難過中六合彩。所以話，所謂首置上車盤解決住屋需求，真係信不信由你嘞。
講開又講，港府拓土一味捨近求遠，最興填海造地，再唔係就打郊野公園主意，有人話首置上車盤其實係為郊野公園邊陲土地建屋開路，唔係冇道理。咁當然，一味為咗保育而盲目反對發展只係本末倒置，但如果擺唔平阻力，分分鐘激起更多爭議。港府到底係「女媧補天」，定係個窿愈補愈大，咁就不妨放長雙眼睇吓喇。