身材纖瘦同豐腴嘅女性，邊類型嘅身材會得到更多男性歡迎呢？相信唔使多講，大家都知道冇標準答案。雖然話係咁講，但現實中卻有人擁有苗條身材時人氣唔高，反而當佢有啲肉地時卻大受歡迎，講緊嘅係喺南韓模特兒界有「肉感女神」之稱嘅延多彬。
雖然話係有啲肉地，但大家唔好誤會延多彬身材帶肥，事實上佢嘅肉感既唔多又唔少，配合174cm身高，令佢睇起嚟更突出、更有台型，喺大型活動亮相，拍埋一班身形纖瘦嘅模特兒時，更係有種鶴立雞群嘅感覺。另外，佢嘅三圍亦相當有睇頭，尤其係豐滿嘅雙峰同美股，每當換上賽車女郎或車展模特兒制服時，盡展玲瓏浮凸嘅身段，因此獲得極高嘅人氣。
其實早喺2009年仍然在學嘅佢，已經開始兼職攝影模特兒工作，不過當時佢嘅身形同今日有極大分別。原來當年佢身材纖瘦，面形亦顯得修長，理論上按今日嘅審美觀嚟睇，呢種瘦削身形加上高挑身材，應該好適合喺模特兒界發展，但事實上卻係剛好相反，雖然佢做兼職Model已經一段時間，但係人氣卻一般，因此佢曾經考慮過離開模特兒界，轉投到一直都頗有興趣嘅設計界發展。不過事情就係如此巧合，當佢萌生離開念頭之後，佢唔再限制自己嘅食量之餘，壓力亦變得冇咁大，結果身形豐滿咗唔少，而佢卻估唔到呢個時候竟然被汽車品牌睇中，邀請佢擔任釜山國際汽車展嘅車模，令佢感到相當意外，佢問對方點解會睇中自己，對方表示有啲肉感嘅模特兒外形更加突出，而且散發出一股健康美。自此之後，佢打消咗離開模特兒界嘅念頭，並成為一位全職模特兒，以肉感美女姿態示人。
由於佢已經有相當工作經驗，故此成為全職模特兒後，唔需要先喺攝影模特兒界累積經驗，甫出道就以賽車女郎身份喺首爾汽車賽中登場，肉感身材加上前凸後趷嘅三圍，再配上性感無比又貼身嘅賽車女郎制服，外形非常迷人，而佢略帶嬰兒肥嘅俏臉，更予人一種親切感，令佢呢次演出相當成功，其名字更成為網上熱搜率最高嘅模特兒。不過佢之前既然做過車模，點解唔一開始便以車模身份登場，反而去咗做賽車女郎呢？其實模特兒事務所本來都有呢個打算，但係由於當時並未有車展活動舉行，同時事務所又想食住個勢，便安排佢擔任賽車女郎工作。阿妹坦言起初都有擔心自己應付唔嚟，但事實證明佢有足夠實力勝任呢份工作，自此以後，佢便成為賽車場上嘅常客，同時經常喺各類平面媒體上見到佢嘅身影。
不過正當佢嘅人氣不斷攀升之際，卻惹嚟唔少批評，唔少人認為佢嘅身形並非主流模特兒嘅身材。一般人面對批評，都會感到好大壓力，但係佢應對方法卻係相當出人意表，事關佢並唔係選擇旅行散心或減少工作量，而係參加超級賽車女郎大賽，從而證明自己嘅實力。雖然最後佢未獲得任何獎項，但係佢並未因此而氣餒，反而再接再厲，翌年參加第4屆南韓賽車模特兒大賽，憑住佢喺賽車女郎界出色嘅表現，加上佢喺比賽中展現無限魅力及自信美，最終獲得年度最佳賽車女郎大獎，從此奠定佢喺南韓模特兒界嘅地位。
簡介：人生往往就係咁耐人尋味，而呢句說話正好套用喺延多彬身上，試問本來身材瘦削嘅佢，又點諗得到變得有肉地之後，竟然會走紅呢？不過與其講佢夠運，不如講佢本身都要有一定嘅吸引力，先至可以獲得他人嘅賞識。如果大家想了解佢多啲，就要Click入呢個網站啦！
網址：http://cafe.daum.net/lovedb004
出生地：首爾
身高：174cm
三圍：35、25、35
撰文：魂