政情：立會請「保安總司令」 月薪11萬
議會抗爭無日無之，愈來愈多議員開開吓會衝出主席台同衝擊官員，又有人組織衝擊立法會，立法會保安嘅工作變得舉足輕重。立法會秘書處日前貼出招聘廣告，聘請有「保安總司令」之稱嘅總保安主任，接替即將退休嘅立法會總保安主任周偉德，而總保安主任嘅每月薪酬兼津貼近十一萬元。
立法會秘書處日前貼出招聘總保安主任嘅廣告。有關職位主要負責制訂立法會綜合大樓及立法會其他處所嘅保安控制系統運作，提供保安方面嘅專家意見、制訂保安政策、策略、計劃同指引，以及確保立法會綜合大樓及立法會其他處所嘅使用者安全等。
薪酬同警司級睇齊
應徵者需要喺十月九日前遞交申請，入職薪酬為每月九萬九千多元，並按年增薪額增至十一萬三千多元，另每個月有一萬元嘅現金津貼，完成合約會再有約滿酬金。換言之，薪酬加津貼已近十一萬元，呢個薪酬同警司級嘅薪酬差唔多，而周偉德以前都係警司，喺退休後受聘為立法會總保安主任。
雖然薪金非常吸引，但招聘條件亦唔低。應徵者需持有認可大學學位；具備最少十五年紀律部隊或保安工作經驗；又要有良好嘅中、英文講寫能力和非常良好嘅分析、溝通及督導技巧等，門檻都相當高。