政情：周浩鼎倡研外國法例 懲佔中漢奸黎
近年港獨思潮崛起，甚至出現三年前佔領行動同埋上年農曆年嘅旺角暴亂。雖然高等法院上訴庭早前就雙學三子衝擊政府總部東翼前地改判囚，但包括壹傳媒黎智英（漢奸黎）在內等四十八名佔中搞手仍然逍遙法外。適逢立法會早前就專題研究方面，邀請議員提交申請，身兼律師嘅議員周浩鼎（Holden）就建議，就普通法規範涉及社會秩序罪行方面，引用外國情況作研究。睇嚟佢係想堵塞漏洞，盡快將漢奸黎等人落鑊。
截至今個月初，立法會秘書處已接獲十三個申請，當中新民黨容海恩就建議提供傳譯及翻譯服務以便當局審核免遣返聲請嘅研究，社福界邵家臻就建議研究有關標準或最高學生做功課時數，工聯會黃國健就建議研究其他地方對連鎖快餐店食物嘅規管；而Holden嘅研究就獲編配喺今個月進行，Holden解釋，話覺得近年社會衝擊比較多，搞到香港秩序失控。佢仲話本身關注喺法律層面上，點樣去處理呢類型事件，所以先提出研究。
48名搞手仍逍遙法外
佢又話其實未做議員之前已經對呢方面有興趣。佢透露，其實自佔領行動過後，見到香港社會氣氛有改變，就開始想就呢方面研究吓。佢仲批評依家有唔少人，包括港大法律系副教授、「佔中三子」之一戴耀廷將違法行為合理化。有見及此，佢就希望透過研究美國、德國同埋日本嘅情況，再作出研究。
三年前嘅佔領行動持續咗七十九日，搞到社會嚴重撕裂，社會秩序大亂，除咗雙學三子被判囚外，現時包括「佔中三子」在內等九名佔中搞手，各被控一項串謀作出公眾妨擾罪，三人連同陳淑莊、邵家臻、張秀賢及鍾耀華，再被控一項煽惑他人作出公眾妨擾及一項煽惑他人煽惑公眾妨擾罪，但佢哋就反口唔認罪，唔找數。
再加上被指係佔領行動幕後黑手嘅漢奸黎等四十八名佔中搞手，律政司卻遲遲未作檢控。Holden可能就係見到咁嘅情況，所以先要求立法會研究其他國家嘅法例，睇吓可以點樣做，咪畀呢班佔中搞手甩身。