中環出更：浸大生涯 譚允芝難忘被罵尸位素餐
香港大律師公會前主席譚允芝（Winnie）前日獲浸會大學頒授榮譽大學院士，佢話今次係首次獲頒院士名銜，講起同浸大淵源，佢話第一次出任校董會成員都係喺浸大，其後仲參與過浸大校長聘任委員會嘅工作，要數最難忘一定係當時遇到衝擊事件，被困之餘仲畀人鬧尸位素餐。
覺得無辜 有啲憤怒
Winnie喺一一至一六年間擔任浸大校董會及諮議會成員，並擔任人事管理委員會副主席及成員達六年，為大學嘅重要人事政策檢討提供意見兼參與校長聘任委員會工作。對於當時校長風波期間被鬧尸位素餐，佢就覺得有啲無辜，因為佢又冇收人工，坦言當其時心裏面係有少少憤怒，但其後就覺得學生有時作出批評時超過咗事實程度，認為學生批評前應先了解事情，又指當日有啲仲疑似唔係學生喎。
講番佢以前讀大學嘅生活，喺香港大學畢業嘅佢當年都有走吓堂，佢笑言都記唔起當時走堂係要去做啲乜嘢？但就話掉番轉佢都有啲時候係會一個人留喺圖書館溫書，只係佢學習時間嘅安排同大學嘅時間表唔係好一樣，而半夜三更走落去食糖水嘅就梗係唔少得啦，仲話住hall對佢生活嚟講係一個好大嘅轉變同影響添！
卓妮