廣東話有句俗語︰「跟官咁耐唔知官姓乜。」形容幫漢奸黎打工嘅《壹週刊》員工，最貼切不過。一個見錢開眼、連契弟都唔怕認嘅人，指望佢對伙記有情有義，有始有終，未免太傻太天真咗啲啩？
話說壹傳媒日前宣布，已就出售《壹週刊》及其他雜誌業務，同買家訂立買賣協議，意味着漢奸黎契弟之路又邁進一大步。淫媒工會方面尋日話，賣方將提供一份「不續聘名單」，另外仲有三成半員工唔肯過渡，對於不獲續聘或者唔願意過渡嘅員工，集團管理層話會考慮喺可行情況下安排內部調職，但係就死都唔肯遣散唔肯過渡嘅員工。
講真，有啲伙記幫漢奸黎捱生捱死，仆心仆命，仲要做埋咁多反中亂港、老作新聞嘅陰騭嘢，人生早已蒙上污點，出到去未必有人敢要，確有苦衷嘅；又正如工會所講，員工同壹仔嘅僱傭關係結束，係源於集團賣盤，漢奸黎點都要有啲表示。特別係有得過檔而堅持唔走嗰一班，喺佢哋心目中，會認為自己為咗堅持漢奸黎嘅「民主大業」，拒絕加盟「紅色資本」「助紂為虐」，單憑呢一份愚忠，在情在理，漢奸黎點都冇可能熟視無睹啩？
只可惜呢啲只係佢哋一廂情願。喺漢奸黎眼中，咩「民主」、咩「自由」都係假，只要有錢收，賣起上嚟眼都唔眨一下。當日決定賣壹仔，佢老哥又話「賣仔莫摸頭」，又話感到「難過」同「沉重」，「難過」係真，不過唔係為咗班伙記，而係落袋嘅錢太少咁解啫。
其實莫講話壹仔員工已經係潑出去嘅水，「死剩種」嘅爛果報亦唔好得幾多。漢奸黎賣咗壹仔後，手頭鬆動啲，照計可以回饋番少少去爛果報，事實卻係該報「假自僱，真裁員」計劃全速進行，據聞美術部第二階段外判已經展開，受影響嘅員工已經全部執包袱走人。鬼咩，漢奸黎家陣周身唔掂，有多個錢都留番嚟打官司又或者着草，伙記喎，你死你賤喇。
真係諗極都唔明，壹仔嗰位高層都識得講，員工係畀漢奸黎「賣落妓寨」，既然自比得性工作者，咁漢奸黎即係姑爺仔啦，畀姑爺仔甜言蜜語氹上床，之後居然付出真感情，試問點會有好結果，更何況係為咗一條又醜又肥，賤格下流卑鄙無恥嘅「姑爺仔」，講出嚟都笑大人個口！
毛伯伯有篇著名文章，題目叫《丟掉幻想，準備鬥爭》，改成「丟掉幻想，準備搵工」送畀壹淫媒全體員工就最啱。須知避得過初一，避唔過十五，漢奸黎變契全弟只係時間問題，冇理由同佢攬住一齊死咁笨啫，吓話！