政情：幫囡囡揀小學 許智峯玩「大抽獎」

送囡囡返學當充電時間

許智峯話為免令五歲半嘅囡囡有壓力，只會報考三間直資學校或私校，仲會參加俗稱「大抽獎」嘅教育局小一統一派位，因為佢身兼中西區區議員，而佢話該區嘅學校間間都咁好，派到邊間都心滿意足。聽落，佢好似喺度賣花讚花香喎。

許智峯話好認同校長喺簡介會中所講嘅嘢，尤其係要小朋友有童真，同埋要多啲親子嘅時間，佢自認係廿四孝老竇，每日朝早都會送囡囡返學，風雨不改，而佢則視之為充電時間。

對於有啲家長催谷小朋友學嘢，要佢哋練成百般武藝，爭取入名校嘅機會，許智峯唔會咁做，只係希望囡囡表現出真我，所以喺暑假期間，囡囡都係去學游水同學琴，再加上自己都唔係喺名校出身，亦唔覺得囡囡一定要入名校喎。