政情:徐英偉落區拍片 幫黨友谷人氣

政府至今仍未公布因應青年新政游蕙禎同梁頌恆取消立法會議員資格後,出缺議席嘅補選安排,但民建聯已經鐵定派出深水埗區議員鄭泳舜(Vincent)出戰九西補選。Vincent近日就密密谷人氣,尋日更聯同黨友兼勞福局副局長徐英偉(Caspar)落區拍片,唔通Caspar知道補選就快到,搶閘為黨友進行宣傳?

同鄭泳舜喺南山邨傾低津

Vincent近日非常活躍,繼之前陪同運輸及房屋局局長陳帆落區,上星期又上載一條訪問教育局局長楊潤雄嘅短片,尋日朝早佢又上載一條同Caspar去深水埗南山邨食晏嘅片段,順便討論政府舊年推出低收入在職家庭津貼(低津)計劃嘅申請繁複問題。

Vincent話南山邨係自己成長嘅地方,而南山邨嘅冬菇亭更係學生時代嘅飯堂;而Caspar亦指自己係街坊,不時會到附近嘅冬菇亭搵食。連討論低津都要揀喺九龍西地區,就算Vincent點澄清拍片同補選無關都無人信喇!

第一手消息請下載on.cc東網iPhone/iPad/Android/Windows Phone Apps