政情：「娥姐」現身鐘表展向張有興派卡片
曾多次參選立法會但悉數低票落選嘅「娥姐」陳玉娥，尋日朝早現身香港貿易發展局喺灣仔會展舉行嘅香港鐘表展開幕禮，並向在場人士派卡片，當中包括曾任立法局議員嘅鐘錶業元老張有興。
稱曾從事鐘錶業 絕非白撞
屢敗屢戰嘅娥姐透露，有意參加因青年新政梁頌恆被取消議員資格而出現的立法會新界東補選，故到場向與會嘉賓拉票。佢又話自己以前亦都係從事鐘錶業，所以獲邀參加今次活動，絕非「白撞」。
張有興現年九十五歲，喺一九五七年起獲委任為市政局議員，其後更成為首位華人市政局主席，一九七三年佢再獲委任為立法局議員，其後成為首批立法局民選議員。未知有志成為代議士嘅娥姐，有冇即場向張有興討教呢？